Malungkot na ibinahagi ng batikang aktres na si Claudine Barretto na ninakawan ang bahay ng kanynag mga magulang sa Subic, Zambales na kakaparenovate pa lamang ni Gretchen Barretto. 

Naisiwalat din niya na dahil sa insidenteng ito ay nalagay sa pelegro ang buhay ng kanyang nanay.

Ayon sa pagbabahagi ni Claudine Barretto, kaka-renovate lamang ng kanilang bahay nang maganap ang insidente kaya naman karamihan sa mga nakuha ay mga brand new at mamahalin.

Sa kamakailang panayam kay Claudine Barretto para sa kanyang pelikulang ‘Sinag’. Naibahagi ni Claudine Barretto ang nangyari sa pamamahay ng kanilang mga magulang.

“Nilooban yung bahay ng mommy at daddy ko. Lahat yun kasi pinaayos ni Gretchen. Lahat ng mga kagamitan doon bago, pina-landscape pa niya, lahat yun milyun-milyon.”

Kabilang sa mga natangay ng mga magnanakaw na kagamitan nila ayon kay Claudine Barretto, ay ang mga best TV’s, mga aircon. Nagkahabulan pa umano ang mga suspek at pulis subalit hanggang ngayon ay hindi pa rin nahuhuli ang mga ito at wala paring development sa kaso.

Naibahagi rin ni Claudine Barretto na hindi lamang ang bahay nila ang napasok ng mga magnanakaw kundi maging ang bahay ng kanyang talent manager na si Arnold Vegafria na mas kilala bilang ALV.

Dahil sa mga insidenteng ito, hiniling ni Claudine Barretto sa mga opisyal ng SMBA at maging ng opisyal ng Olongapo na gawan ng paraan ang mga ganitong pangyayari.

Naibahagi rin ni Claudine Barretto na dahil sa nangyari ay muntik nang mapasok sa ICU ng kanyang ina. Muntikan na umano itong mawala sa kanila buti na lamang ay nakita ito ng kanyang anak na si Noah.

Ayon kay Claudine, nasa hotel sila noong mga panahon na iyon kaya naman kung hindi umano ito nakita ni Noah na nakayuko ay malamang ay tuluyan na itong nawala sa kanilang piling.

Muli ring ipinahayag ni Claudine Barretto ang pinaniniwalaan niyang responsibilidad ng mga anak na alagaan ang mga magulang. Kung hindi man financially ay maari rin naman na ang oras na lamang ang ibigay para sa kanila.

Sa ngayon ay excited na si Claudine Barretto sa kanyang panibagong project na pinamagatang Sinag na kukunan sa iba’t-ibang magagandang lugar sa bansa.