Ibinahagi ng beteranong komedyante at aktor na si Dennis Padilla ang kanyang masakit na karanasan kaugnay ng kasal ng kanyang anak na si Claudia Barretto sa anak ng negosyanteng si Basti Lorenzo, na ginanap noong Martes, Abril 8. Sa isang phone interview kasama si Ogie Diaz, inilahad ni Dennis ang kanyang saloobin at ang mga pangyayari sa likod ng kontrobersyal na kasal na pinag-uusapan ngayon sa social media.

Ayon kay Dennis, labis siyang nasaktan nang matuklasang hindi siya isinama sa entourage ng kasal at itinuturing lamang siyang isa sa mga bisita. Naramdaman niyang tila hindi siya bahagi ng napakahalagang araw sa buhay ng kanyang anak, isang damdaming lalong nagpabigat sa kanyang kalooban. Matatandaang naging viral ang kanyang mga post sa social media kung saan nagpahayag siya ng hinanakit at pagkadismaya, lalo na’t hindi siya ang naging katuwang ni Claudia sa paglalakad nito patungo sa altar—isang papel na madalas na iniuukol sa isang ama.

Sa panayam noong Miyerkules, Abril 9, ikinuwento ni Dennis ang tungkol sa isang dinner nila ng kanyang mga anak noong Marso 18.

Dito umano ay nagkaroon sila ng pag-uusap tungkol sa kasal, at sinabi pa raw sa kanya ni Claudia, “I want you to look good Papa on that day.” Dahil dito, inakala ni Dennis na may espesyal siyang parte sa programa at inaasahan niyang magiging bahagi siya ng entourage.

Nagbigay ito sa kanya ng pag-asa at tiwala na sa pagkakataong ito, siya ay magiging tunay na bahagi ng mahalagang yugto sa buhay ng anak.

Hindi rin nakaligtas kay Dennis ang emosyunal na pag-uusap nila ni Claudia ilang oras bago ang kasal. Ayon sa aktor, naglabas ng saloobin ang anak at nagsabing tila ayaw nang tumuloy sa kasal dahil sa kawalan umano ng sigla o interes mula sa nobyo nitong si Basti isang linggo bago ang seremonya.

Dahil dito, pinayuhan daw niya si Claudia na kung sa tingin nito ay hindi pa siya handa, ayos lang kung hindi ituloy ang kasal at tiyak niyang maiintindihan ito, lalo na siya bilang isang ama.

Ngunit makalipas lamang ang isang oras, muling tumawag si Claudia upang ipaalam kay Dennis na tuloy na tuloy na ang kasal. Agad namang nagbihis si Dennis, sumakay patungong Caloocan upang sunduin ang kanyang ina, at saka nagtungo sa simbahan nang may dalang pag-asang may mahalaga pa rin siyang papel sa seremonya.

Ngunit nang magsimula na ang entourage, saka lamang niya nalaman na hindi siya ang maghahatid kay Claudia sa altar. Ibinahagi niyang napakasakit ng sandaling iyon para sa kanya—isa umano ito sa pinakamasakit na karanasan niya bilang ama, at mas matindi pa kaysa sa mga naunang pagkakataong hindi siya nakasama sa ibang mahahalagang kaganapan sa buhay ng kanyang mga anak.

Hindi na raw niya napigilan ang sarili at napaluha siya habang pinapanood ang anak na lumalakad sa altar kasama si Marjorie.

Sa ngayon, wala pang inilalabas na opisyal na pahayag sina Marjorie Barretto, Claudia, o maging si Basti Lorenzo ukol sa isyu. Bukas pa rin ang maraming netizen, tagahanga, at maging si Dennis Padilla sa posibilidad na magkaroon ng linaw at pagkakaunawaan sa pagitan ng mag-ama. Sa kabila ng lahat ng sakit at hinanakit, umaasa pa rin si Dennis na balang araw ay maaayos ang relasyon niya sa kanyang mga anak.