Mula sa TikTok ni Camille Viceral at Instagram ni Vice Ganda

Hindi napigilan ng pamangkin ng komedyanteng si Vice Ganda na si Camille Viceral na bumanat kontra sa isang kritiko na sinasabing umaasa lang sila sa kinikita ng “It’s Showtime!” host.

Sa kaniyang TikTok account, pumalag si Viceral sa komento ng isang basher na si Vice lamang ang source of income ng kanilang pamilya.

“Nakakabastos po. Lumaki po kami sa hirap at alam namin na ang pag-unlad ng isa ay hindi pag-unlad ng lahat. Dahil kung ‘yun po ang iisipin namin, hihilahin po namin ‘yung tao pababa,” saad ni Camille.

Dagdag pa ni Viceral, may kani-kaniya silang pag-iisip at paraan upang kumita kaya hindi totoong umaasa lamang sila sa kaniyang tiyuhin.

Paliwanag ni Camille, bagamat nakakatanggap ng tulong o regalo mula kay Vice, hindi umano sila naghahangad ng higit pa sa naibibigay sa kanila.

“Kung ano po ‘yung binibigay sa ‘min, ‘yun lang po ‘yung aangkinin namin. Hindi na rin po kami maghahangad nang sobra-sobra pa doon. Ayun lang. Huwag po tayong nag-a-assume at huwag po tayong bastos,” banat pa niya.

Umabot na sa 1.4 milyon ang nakapanood ng video ni Viceral habang nasa higit 140,000 ang nag-like nito sa TikTok.

Si Camille ay anak ng kapatid ni Vice.