Kenneth Hizon, nabulabog ang mundo dahil sa rebelasyon ni Kathryn Bernardo.

Netizens quickly discovered the identity and social media acounts of Kathryn Bernardo’s “first ever crush” whom she identified as “Kenneth.” Based on the investigation made by netizens, Kenneth (right) is now a doctor.
PHOTO/S: @bernardokath on Instagram / Edward Hizon Facebook

Popular search ngayon sa social media ang pangalang “Edward Hizon.”

Siya ang pinaniniwalaang ama ni Kenneth, ang “first-ever crush” ng A-list star na si Kathryn Bernardo.

Naging trending topic din nitong nakalipas na mga araw ang “Kenneth” matapos pangalanan ni Kathryn ang kauna-unahan niyang crush noong Grade 2 pa lamang siya.

Isiniwalat ito ni Kathryn sa episode ng Pilipinas Got Talent (PGT) noong Linggo, Abril 6, 2025.

“Ang first-ever crush ko, siguro Grade 2 ako noon, sa probinsiya namin. Yung first ever, mestizo siya, mestizo siya,” paglalarawan pa ng aktres kay Kenneth.

Hindi naging mahirap para sa netizens na hanapin si Kenneth.

Sa tulong ng social media at masusing imbestigasyon, nakakuha sila ng kopya ng mga larawan nina Kathryn at Kenneth noong mga paslit na bata pa ang mga ito.

‘AT NAHANAP NA NGA SI KENNETH’

Ayon sa mga marites at magagaling mag-imbestiga na netizen, ang ‘Kenneth Hizon’ ang umano’y nag-iisang may pangalan ng Kenneth na naging kaklase noon ni Kathryn kaya naman siya ang itinuturo ng marami.#KathrynBernardo #KennethHizon pic.twitter.com/98cK4t6LcR

— Kapamilya Outsider (@kpmlyaoutsidr) April 8, 2025

Natunton din nila ang Facebook account ng isang Edward Hizon na sinasabing ama ni Kenneth.

Noong Lunes, Abril 7, 2025, ni-repost ni Edward sa Facebook ang video ng pag-uusap ni Kathryn at ng mga kasamahan niya sa PGT na sina Melai Cantiveros at Eugene Domingo.

Caption niya rito, “Dpa nya nkalimutan bnso q”

Ang “bunso” na tinutukoy ni Edward ay si Kenneth.

Sa kasalukuyan ay meron na itong 5.3K likes at mahigit 750 comments mula sa netizens na tuwang-tuwa sa kanilang tagumpay makahanap ng mga impormasyon tungkol sa childhood crush ni Kathryn.

WHO IS KENNETH?

Biglang nabulabog ang mundo ni Kenneth dahil sa rebelasyon ni Kathryn.

Nalaman ng netizens na ganap nang doktor si Kenneth dahil binati siya ng kanyang ama sa tagumpay niya sa pamamagitan ng isang Facebook post na may petsng Abril 18, 2024.

“Congratulations!!! Dr. Kenneth Edward B. Hizon. May anak nko n doktooooor. Thank you very much Lord. We are very proud of you my son!!!” mensahe ng pagbati ni Edward sa bunsong anak.

Base sa mga larawan at impormasyong nahanap ng followers ni Kathryn, isang taon ang tanda sa kanya ni Kenneth.

Pero hindi nagkakalayo ang petsa ng kanilang mga kaarawan.

Isinilang si Kenneth noong Marso 16, 1995; samantalang Marso 26, 1996 naman ang araw ng kapanganakan ni Kathryn.

Kapwa rin sila nagmula sa Cabanatuan City, Nueva Ecija.

Natuklasan na rin ng mga kinikilig na netizens ang Facebook at Instagram accounts ni Kenneth.

Nadagdagan na ang bilang ng kanyang followers at pinuputakti ng mga komento ang mga social media post niya dahil marami pang nais malaman ang fans ni Kathryn tungkol sa personal na buhay niya.